إزاى أتحكم فى الدايرة ؟! #5

فى المقال اللى فات فهمنا ازاى نتعامل مع الحساسات و ازاى نخليها تتحكم فى ترانزيستور و تضحك عليه و تشيله الليله :)

طيب ما حدش سأل نفسة ازاى اقدر اتحكم فى شدة حساسية الدايرة

يعنى انا مثلا فى الدايرة اللى فاتت مش عايزها اول ما تشوف نور تشتغل على طول 

لأ انا عايزها تشتغل عند شدة اضاءة معينه

طيب تعالوا نشوف الدايرة اللى فاتت 

و زى ما قلنا الجهد و التيار بيمر فى المقاومة الضوئية و حسب شدة الضوء بيشغل القاعدة

لو انا بقى عايز الجهد و التيار الخارج من المقاومة الضوئية ما يكونش كافى لتشغيل القاعدة عند اول ضوء!

سامعك يا فتك ياللى بتقول نوصل مقاومة بين القاعدة و المقاومة الضوئية لأ طبعاً اقعد يا بابا :)

فى الحالة دى بنضيف مقاومة فعلا بس بين القاعدة و القطب السالب و دى هتبقى حاجه اسمها Voltage Divider 

voltage divider دايرة من مقاومتين و مصدر للجهد او تعتبر بتقسم الجهد 

و بتخرج الجهد اللى انت عايزه لو حسبتها صح

هى ليها معادلة و انا واحد بيكره الارقام و ما كنتش ناوى اكتبها بس لما ضربتها على الآلة الحاسبة لقيتها حلوه :) قلت مش خسارة فيكم ^_^

المعادلة R2/(R1+R2)*Vin

بالعربى قيمة  المقاومة 2 المتصلة بالموجب على قيمة(المقاومة 2 المتصلة بالسالب + المقاومة1) فى جهد المصدر هيديلك الجهد الخارج و ده بناخدة بين المقاومتين مع السالب 

تعالى نشوف علشان انت شكلك هتتعبنا معاك ^_^

بص هنا 

عندى رقم 4 مصدر جهد 9 فولت 

رقم 3 جهد الخروج من الدايرة و قيمته 5 فولت و ظاهر قيمته على الفولتميتر اهو

رقم 1 مقاومة 1.2 كيلو

رقم 2 مقاومة 1.5 كيلو

نجرب بقى 1.5 على 1.2+1.5 يساوى +0.5555555556

فى 9 هتلاقى الناتج 5 رقم صحيح بدون كسور

طيب نرجع لموضوعنا

فى الدايرة بتاعتنا قاعدة الترانزستور ليها حد ادنى من الجهد لو قل عن كده مش هيشتغل يبقى انا محتاج اتحكم امتى الحد الادنى ده يعلى صح كده

طيب نبص على الدايرة دى

اضفنا مقاومة 10 كيلو بين السالب و المقاومة الضوئية

الضوء المسلط 782 لكس و قيمة المقاومة الضوئية حالياً حوالى 23.31 كيلو فى المحاكى

الجهد الخارج 2.56 و كافى لتشغيل القاعدة ( ده بالنسبة للمحاكى برضو)

تعالوا نجرب نقلل القيمة للنص 

هنا المقاومة 5 كيلو و الجهد الخارج 1.58 فولت و غير كافى لتشغيل قاعدة الترانزستور

بس هتواجهنى هنا مشكله انى مش كل مره عايزه اغير قيمة المقاومة رقم 2 هفكها و الحم واحدة جديده مكانها
هنا بقى ييجى دور المقاومة المتغيرة

المقاومة المتغيرة دى زى زرار الصوت الموجود فى السماعات تلفها يمين او شمال و هى تغير المقاومة
و منها قيم مختلفة يعنى بتجيب منها حسب الحد الاقصى اللى انت عايزه
مثلا بتجيب 10كيلو لو الدايرة بتاعتك ما ينفعش المقاومة بتاعتها تكون اعلى من 10 كيلو هنتطرق لده فى المواضيع الجايه

تركيب المقاومة الداخلى لازم نفهمه برضو

فى 3 اطراف هنا AWB  و فى شريط متصل مباشر بين A و B  الشريط ده ليه قيمه ثابته خلينا نفترض انها 10 كيلو اوم
فى الطرف اللى فى النص W و ده الطرف اللى قيمته بتتغير و الطرف ده ملامس للشريط طول الوقت و فى قياس بينه و بين A و B
لو انا حركته ناحية B للآخر هتبقى قيمته بين BW 0 ohm و بين AW 10Kohm
و لو انا حركته للنص بالظبط هتبقى قيمته متساوية بين AW و BW و هتبقى 5 كيلو
المهم ان الفرق دايماً بين AB مش هيتغير

هنا احنا محتاجين نخلى المقاومة دى طرفين فقط فبنستخدم الطرف اللى فى النص مع اى طرف تانى او بنقفل طرف و ده حل بيستخدمه معظم الناس اللى بتشتغل فى المجال ده

المقاومة بين WB اصبحت مساوية للصفر تقريبا و اى مقاومة داخليه من خلال الشريط لا تحتسب معنى كده ان W و B  بيعاملوا معاملة رجل واحدة

ده الرمز بتاعها فى الدايرة

و ده لما نقفل الطرفين على بعض


تعالوا بقى نشوف لما نضيفها للدايرة

رقم 1 المقاومة المتغيرة بتاعتنا
و رقم 2 مقاومة للحماية فى حال المقاومة الضوئية وصلت للصفر و المتغيرة قيمتها صفر
ساعتها هيحصل حاجه اسمها Short Circuit فى الدايرة و مسار الباور كله هيبقى ماشى من السالب للموجب
و هتبقى الدايرة مكافأة لدايرة قصر زى كده

إنما لما نحط المقاومة اى نعم هى هتستهلك من الطاقة بس مش هتتسبب فى تلف الدايرة

كده فهمنا ازاى نتحكم فى الدايرة و نخليها تشتغل حسب كمية الضوء الداخل ليها
خلونا نشوف الدايرة هتكون شغاله ازاى بالفيديو:

من هنا و لغاية المره الجايه هسيب لكم فزورة
ازاى نقدر نعكس عمل الدايرة ؟ يعنى بدل ما تنور مع النور تفصل مع النور و تنور فى الضلمه .

خليكم متابعيننا علشان هنتكلم عن حاجه ظريفة جدا بالنسبة للترانزستور المره الجايه.