الترانزستور وظيفته إيه؟! #4

الترانزستور من العناصر اللى عملت ثورة فى عالم الالكترونيات بسبب صغر حجمها و قلة استهلاكها للطاقة فقبلها كان فى حاجه اسمها الصمامات و دى كانت معمولة من الزجاج و سهلة الكسر و بتستهلك من طاقة المصدر بشدة و بتسخن

إتعرف على تاريخ الترانزستور بشكل أفضل من مقال ويكيبيديا ترانزستور

طيب يفيدنا احنا فى ايه الترانزستور 

الترانزستور بيستخدم كمكبر أو كمفتاح 

و الخطأ اللى بيقع فيه معظم المبتدئين إنهم بيعتقدوا ان الترانزستور ممكن يكبر الجهد مثلاً من 1 فولت لـ5 فولت و ده مش صحيح

طيب خلونا نفهم ايه هو الترانزستور و هنستخدمه ازاى فى الدايرة بتاعتنا

الأول كده تخيل معايا لو عندك قطعة حديد وزنها 1 كيلو انت كشخص تقدر تشيل لغاية 10 قطع مثلاً 

إنما لو عندك 500 قطعه انت عايز تشيلهم توديهم فى مكان تانى أكيد هتجيب عربيه 

طيب هل العربية دى بتمشى لوحدها ؟ لا طبعا انت اللى بتتحكم فيها اذا كانت تمشى او تقف

يبقى انت كده عندك 3 حاجات المكان الاصلى للحديد و المكان اللى هيتنقل فيه الحديد و انت كشخص متحكم فى العملية بس ما تقدرش تعملها بنفسك 

على صعيد أخر بدل نفسك بمقاومة ضوئية و العربية هى الترانزستور اللى هيشيل الحديد و ينقله لمكان تانى 

و هسألك سؤال؟

هل لما بتبقى راكب العربية بتبقى حاسس بوزن الحديد؟؟؟؟!

لا طبعا انت قاعد معزز مكرم كل المجهود اللى بتعمله هو قيادة العربية اكتر من كده مش بتبذل مجهود

لكن هنا العربية هى اللى بتستهلك طاقة علشان تنقل 

خلينا نعيد صياغة المشهد ده بقى الكترونياً 

عندنا حساس "مقاومة ضوئية" كمثال و احنا عرفنا فى المواضيع اللى فاتت انها كل ما تتعرض للضوء هتسمح بمرور تيار اكبر 

المقاومة دى متصلة على قاعدة ترانزستور و على المجمع فى جهد+ و المشع شايل 10 لدات 
(و طبعا احنا كده فاهمين ان المقاومة الضوئية ممكن تتحرق مننا لو وصلنا عليها اكتر من لد)

هنا التيار بيخرج من الموجب يروح لغاية الترانزستور و يقف 

لو المقاومة الضوئية متسلط عليها ضوء كده يبقى احنا عندنا تيار بيمر لغاية القاعدة 

يعنى المقاومة الضوئية دلوقتى بتقول للترانزستور شغل الدايرة و عدى التيار 

هنا الترانزستور بقى هيعدى التيار من المجمع للمشع طالما فى تيار على القاعدة بيعدى من خلال المقاومة الضوئية 

لما المقاومة الضوئية قيمتها تكبر و ده بيحصل لما الدنيا تضلم هتلاقى اللدات كلها انطفت و ده نتيجة ان مافيش تيار على القاعدة فمش هيسمح بمرور تيار من المجمع للمشع لغاية ما ياخد الامر مره تانيه

تعالوا نشوف محاكاه للكلام ده





رقم 1 جهاز بيقيس التيار اللى معدى فى الدايرة هنلاقى ان قيمته 197 ميكرو امبير و ده طبعا رقم لا يذكر

رقم 2 بيقيس التيار اللى خارج من المقاومة الضوئية للقاعدة 805 ميكرو امبير و ده رقم برضو لايذكر اكتر من اللى قبله 
لو بصينا فوق رقم 2 على الشمال كده هنلاقى R1  مكتوب جمبها 10lux و دى قيمة الضوء المسلط على المقاومة الضوئية و تعتبر ضلمه

يعنى الدايرة تعتبر فى حالة سكون






هنا لو بصينا كده
رقم 1 كمية التيار المسحوبة 960 مللى امبير و دى اللى بتمر حاليا جوه الترانزستور لباقى الدايرة

رقم 2 كمية التيار المار للقاعدة 18 مللى امبير و القيمة دى كانت كافيه لتشغيل القاعدة و ده سمح للتيار يمر بين المجمع و المشع

رقم 3 كمية الضوء 1000 لكس و دى اللى قللت قيمة المقاومة الضوئية و اتسببت فى الاتنين السابقين








هنا بقى الدايرة بتاعتنا هنلاحظ رقم 1 قيمة سحب التيار عن طريق ال 5 لدات 
رقم 2 قيمة التيار المار للقاعدة 
رقم 3 كمية الضوء المسلط على المقاومة الضوئية





ملحوظة : الدايرة بدون حمايات ما تطبقهاش زى ما هى 
أمبير : هى وحدة قياس التيار


فى كل الرسومات السابقة احنا استخدمنا الترانزستور كمكبر عادى بياخد قيمة قليلة جدا و يبدأ يمرر تيار اكبر منه للدايرة يعنى بياخد اشارة يتشغل طول ما الاشارة دى موجوده

تابعونا فى المقال الجاى هنعرف ازاى نتحكم فى الدايرة دى و ازاى نخليها تشتغل لما تبقى الدنيا ضلمه و العكس
ما تنسوش تعملوا إشتراك فى القناة على يوتيوب و لايك للصفحة على فيس بوك علشان توصلكم كل المواضيع الجايه...