مبتدئ فى الالكترونيات؟! تعالى اما اقول لك #2

قرأت المقال الاولانى؟

طيب تعالى نشوف مع بعض الحاجات اللى لازم تكون عندك قبل ما تقرأ اى حاجة تانى.

أول حاجة لازم تكون عندك هى البريد بورد

 و دى يا سيدى حاجه ما حدش بيستغنى عنها حتى المحترفين 

بتعطيك الامكانيه انك تجرب اى دايرة بدون لحام و بدون ما تتلف العناصر بتاعتك كأنك بتجمع مكعبات

و دى وجودها معاك كمبتدئ إعتبرة اجبارى :)

الحاجة التانيه جهاز القياس "افوميتر" 

جهاز الملتى ميتر او الافوميتر

هتحتاجه جدا لقياس الجهد و كمبتدئ ممكن تحتاج تقيس المقاومات كمان هيفيدك فى فحص معظم المكونات و معرفة اذا كانت سليمه او تالفه

وجوده معاك كمبتدئ مهم 

لو انت لسه مش متأكد ان كنت هتكمل فى الالكترونيات او لا ممكن تستغنى عنه بشكل مؤقت 

علشان تعرف بيستخدم ازاى شوف الفيديو ده :

العناصر بقى اللى هنحتاجها

المقاومات

أى جهاز او حاجه الكترونيه هتشوفها فى حياتك لازم تلاقى عليها مقاومات و بكميه مش قليلة 

فأعمل حسابك ان معظم الدوائر هتستخدم فيها مقاومات و برضو هتكون كتير (ما تقلقش دى رخيصه جدا)

و وظيففتها انها تقلل التيار

المكثفات 

فكرة عمل المكثف شبيهه شويه بالبطارية هو عنصر بيخزن شحنه كهربية بسرعه كبيره و يفرغها برضو بسرعه كبيرة 

و بيستخدم لتنعgيم التيار و فى دواير المؤقتات و دواير التردد 

و بنقدر نتحكم فى وقت الشحن ووقت التفريغ بتاعه كمان 

و برضو من العناصر اللى سعرها بسيط جدا

الترانزستور

و ده بقى لو قعدنا نتكلم عنه و عن انواعه شهر مش هنخلص :)

الترانزستور برضو من العناصر المهمه جدا جدا جدا خلونا نقول مثال 

انت مثلا محتاج تشيل كرتونه من مكان لمكان و الكرتونه تقيله جدا عليك لو شيلتها لوحدك هتقعد فى العنايه المركزه 😃

فبتجيب واحد شيال يشيل الكرتونه و يحركها زى ما انت عايز و هنا انت المتحكم و هو اللى شايل 

الترنزستور بيعمل نفس الفكرة بس مش بيشيل كراتين 

بيشيل تيارات كبيره ما تقدرش الدايرة تشيلها بنفسها 

اللد

و طبعا مش محتاج اتكلم عنه كتير كلكم اكيد عارفينه 

بس اللى مجربش اللد عبارة عن دايود ضوئى له قطبيه و فولتيه ثابته 

و هنستخدمه فى الدواير بتاعتنا للإستدلال على وظائف الدائرة كمخرج

يعنى لو بتعمل دايرة مثلا وظيفتها تفصل النور لما الشمس تطلع فاكيد مش اول ما هتشطح تنطح و تقوم موصل لمبه حقيقية  على كهرباء البيت 

و فى الحالة دى هتستعيض عنها بلد و هو هيبين لك ان الدايرة بتؤدى 

وظيفتها 

اللد منه انواع و اشكال كتير و منه اللى بينور بس او اللدى بيخرج اشعه فوق البنفسجية او تحت الحمراء

المقاومة المتغيرة 

اكيد من الممتع جدا انك تتحكم فى الدايرة بتاعتك سواء هتتحكم فى سرعه او فى شدة اضاءة او شدة صوت فأكيد نقطة الضبط تهمك 

هنا بييجى دور المقاومة المتغيرة اللى طول ما انت بتلف العامود اللى فى النص انت بتغير قيمتها

الآى سى 

الاى سى عبارة عن دايرة كامله مصغرة و محطوطه جوه البلاستيكه ام رجلين كتير دى 

منها الانالوج و ده اللى احنا محتاجينه و منها القابل للبرمجه ده سيبنا منه دلوقت 

كل اى سى من دول عليه رقم تقدر تجيب من خلاله داتا شيت خاصه بالاى سى او تشوف الدواير اللى بيدخل فيها الاى سى ده 

بكده احنا اخدنا فكرة عامه عن الالكترونيات و مستعدين نبدأ

خلينا بقى المقال الجاى هنقول عن قائمة المشتريات اللى هنحتاجها علشان نبقى جاهزين نطبق عملى اثناء الشرح