إيه هى الحساسات؟! #3

من الحاجات المهمه فى الدواير الالكترونية اللى بتشتغل اوتوماتيك من غير اى تدخل منك هى الحساسات

و الحساس ده يا سيدى عبارة عن عنصر الكترونى عند ظروف معينه بتبدأ تتغير حالته و بالتالى بيؤثر على الدايرة و بيغير حالتها برضو 

على سبيل المثال 

المقاومة الضوئية LDR

كنا اتكلمنا عليها سابقا انها مقاومة فى حالة عدم وجود ضوء تبقى قيمتها 10 كيلو اوم مثلا 

و لما تتعرض لضوء قيمتها بتقل 

طيب و ده تأثيرة إيه 

فى الدواير احنا بنستخدم المقاومات لتقليل التيار و طبعا كل ما كانت قيمة المقاومة كبيرة كل ما التيار اللى بيمر فيها بيبقى قليل جدا

لما بنحط المقاومة الضوئية فى الدايرة كحساس للضوء 

أول ما هتتعرض لضوء هتبدأ تمرر تيار للدايرة و ساعتها الدايرة هتشتغل 

طيب خلونا نثبت كلامنا 

هنجيب الدايرة اللى فاتت 

فاكرينها اللى كان فيها سويتش دى آه ☺

هنشيل السويتش و نحط مكانه المقاومة الضوئية  زى كده 

هنا هيمر التيار من الموجب عن طريق المقاومة R1  و يعدى خلال اللد بعد كده يقف عند المقاومة الضوئية 

لو الممر مفتوح (يعنى المقاومة معرضة للضوء و قيمتها قليلة) التيار هيكمل طريقة بسرعته عادى و يشغل اللد 

لو الممر ضيق جدا ( يعنى مافيش ضوء على المقاومة و قيمتها عالية ) هنا التيار هيعدى فى R1 و يكمل فى اللد بعدها هيوصل للمقاومة الضوئية يلاقى الممر بقى ضيق جدا فقوة التدفق تقل و ما يقدرش يشغل اللد او يشغل اللد بس يخليه ضعيف جدا

خليكم فاهمين النقطه دى لأنها هتدخل بعد كده فى دوائر معقده 

الجدير بالذكر ان المقاومة الضوئية ما ينفعش تشيل حمل كبير يعنى يادوبك هو لد اكتر من كده هتتحرق بسبب ان الحمل كبير عليها و بيخلى كمية تيار كبيرة تعدى جواها 

الموضوع ده هنتطرق له لما نتكلم عن الترانزستور فى المواضيع الجاية

المهم دلوقتى نجرب الدايرة و نشوف حالتها فى الضوء و حالتها فى الضلمه 

و لو تفتكروا اننا قلنا ان المقاومة الحرارية بتشتغل بنفس الطريقة بس عن طريق الحرارة 

عايزكم المرة دى تطبقوا المقاومة الحرارية فى الدايرة بدل الضوئية مش هقول اى ارشادات غير انك ما تعرضش المقاومة الحرارية للهب مباشر علشان تسخنها يكفى تحطها فى مجال هواء ساخن او على بعد 1سم من مكواة الملابس علشان تسخن و تحقق معاك نتيجه 

و طبعا بتاخد وقت على ما اثر الحرارة يزول فهتفضل مشغلة الدايرة شوية و تضعف بالتدريج لغاية ما تبرد

لغاية هنا احنا فهمنا الفكرة العامة للحساسات و ضرورى نعرف ان مش كل الحساسات عبارة عن مقاومة فى حساسات بتشتغل ميكانيكياً و فى منها بالاشعة التحت الحمراء 

المرة الجاية هنعرف مع بعض ازاى نخلى الحساس يشيل حمل اكبر من قدرته