اللحام

أولا كاوية اللحام :

كواحد لسة مبتدئ و انت رايح تشترى كاوية اللحام من عند اى حد بيسألك انت عايزها كام وات و هنا انت بتقع فى حيرة تشترى 20 وللا 40 وللا 60 وات ؟؟! و غالباً اللى هيحصل انك بتختار اعلى واحده هوب الشغل ولع :)


مبدأياً كل ما كانت القدرة عالية هتبقى الحرارة عالية طيب 30 و 40 وات يعتبر اختيار مناسب جداً لفك و لحام العناصر الالكترونية من على بوردة بدون ما نتلفها 60 وات و دى كاوية لنقط اللحام اللى بيكون فيها حجم الموصل كبير فالحرارة بتتسرب فيه اثناء اللحام او الفك و علشان كده بنستخدم كاوية عالية شوية بحيث الحرارة بعد الفقد اللى هيحصل تكون كافيه انها تصهر القصدير .

30 و 40 وات مناسب لمعظم شغل الالكترونيات زى الترانزستور و المقاومات و المكثفات لأن معظم العناصر دى بتبقى ملحومة على موصلات صغيرة نسبة الفقد فيها مش كبيره فالحرارة اللى بتوصل كافية لصهر القصدير .


تانى حاجه هنعرفها القصدير :

مش هنتكلم كتير عن القصدير لأن تطبيقاته كتيره جداً و مش على على قد الالكترونيات بس لكن ضرورى نعرف ان قصدير اللحام سبيكة من مادتين المادة الاولى هى القصدير و المادة التانية الرصاص و احيانا بيدخل الزنك او الفضه لتطبيقات تانيه

ضرورى كمان نعرف ان كل ما زادت نسبة القصدير و قلت نسبة الرصاص هتقل درجة الحرارة اللازمة لذوبان القصدير يعنى مش هتحتاج كاوية درجة حرارتها عاليه

معظم القصدير اللى بيتباع لغرض الاستخدام فى لحام الالكترونيات بيتكون من 60% قصدير 40% رصاص و طبعا النسب بتختلف حسب ما انت عايز لكن دى تعتبر نسبة كويسة للتطبيقات اللى ما بينتجش عنها حرارة عالية.


مساعد اللحام:

مساعد اللحام بيبقى دايما مادة بنستخدمها اثناء اى عملية لحام و غالبا وظيفة المادة دى انها تركز الحرارة فى نطاق ضيق علشان نقدر نلحم بشكل كويس فى المكان ده بالذات

فى لحام الالكترونيات احنا بنستخدم حاجه اسمها

Flux

و دى ماده اغلب اللى بيلحموا يعرفوها عاملية زى الكريم و ممكن تخط منها مباشرة على نقطة اللحام بمفك او اى حاجه و سهلة التنظيف بعد عملية اللحام.

فى مادة تانية كمان بيستخدمها الناس القديمة فى الالكترونيات اسمها الرجينة أو الافونيا المادة دة عبارة عن حجر اصفر فاتح بييجى فى شكل صلب علشان تحط منها على نقطة اللحام بتحتاج انك تسخن بسن الكاوية و بعدين تحط السن على البوردة فتتنقل المادة مكان ما انت عايز تلحم

مميزات المادة دى انها بتخلى نقطة اللحام قوية جدا و شكل القصدير متناسق

عيوبها انها بتتصلب بعد عملية اللحام بس ممكن تتشال بتنر

معظم الطلبة بتشترى الفلكس و بتفكر ان الغرض منه تنضيف سن الكاوية :)


منظف الكاوية:

اثناء عملية اللحام لازم السن يكون لامع طول الوقت لو حصل ان السن اسود او كربن او لونه غير لازم ننضفة

بيتم التنضيف عن طريق اسفنجة خاصة بكاوية اللحام بتكون تتحمل الحرارة علشان ما تسيحش و لازم السفنجه تكن مبلوله ميه اثناء التنضيف و بيتم تمرير سن الكاوية عليها كل ما نحس انها اسودت لأن السن لما بيسود بيبقى نقله للحرارة اقل

لو ما عندناش اسفنجة الكاوية اى قطعة قماش قطن نلفها على بعضها بحيث يبقى السمك 1 سم و نبلها و بتستخدم زى الاسفنجة بالظبط


عملية اللحام :

أثناء عملية اللحام لازم نراعى شوية حاجات

- اول حاجه الكاوية لو انت بتستخدم ايدك اليمين يبقى الكاوية بالفيشة بالحامل يكونوا على ايديك اليمين و انت بتشتغل ما ينفعش الكاوية و السلك يتقاطعوا مع بعض و الا قول على نفسك يا رحمن يا رحيم

--------------------------------------------------------------------------------------------------------------------------------

السطح اللى هتلحم فيه لازم يكون نضيف و بيلمع بعض الخشونة فى السطح بتفيد معظم الوقت و بتساعد القصدير انه يمسك كويس يعنى ممكن تستخدم سلك الومنيوم من بتاع المواعين و تنضف بيه بالراحة قبل اللحام سواء على بوردة او الارجل خصوصا المقاومات الكبيرة معظم الوقت هتلاقى فى اكسده على اطرافها

--------------------------------------------------------------------------------------------------------------------------------

الاضاءة ضرورى جدا تراعى انك تكون قاعد فى اضاءة كويسة اثناء اللحام علشان احيانا بتحصل اخطاء و اللحام يخرج من مكانه و يعمل قفله

-------------------------------------------------------------------------------------------------------------------------------

درجة الحرارة المناسبة بس كبداية كاوية 40 وات هتعمل معاك كل المهام لحد ما تعرف بالخبرة امتى محتاج كاوية اعلى و امتى محتاج كاوية اقل.

-------------------------------------------------------------------------------------------------------------------------------

الامان دايما نخلى الكاوية فى الاستاند و بعيده عن المواد القابله للاشتعال أو المواد البلاستيكيه


نبدأ عملية اللحام

نشوف اماكن الاطراف اللى هنلحمها و نتأكد انها نضيفة نحط العنصر اللى هيتلحم و نضيف مساعد اللحام و بعد

لفيديو لتوضيح عملية اللحام للمبتدئين

اتمنى يفيدكم و تعلموا غيركم

شكراً للمشاهدة و ما تنسوش تعملوا اشتراك فى القناة.

فيديو لشرح لحام العناصر الالكترونية