إصنع بنفسك باور سبلاى لتجارب الإلكترونيات

كل مبتدئ فى الالكترونيات بيبقى دايما محتاج لمصدر للجهد علشان يجرب بيه الدواير بتاعته بدل استخدام البطاريات و اللى هتعطى وقت قصير فى التجارب و هتكلفك تمن تغييرها كل شويه بالرغم انها أأمن مصدر طاقة بالنسبة للتجربه الى حد ما من وجهة نظرى.!

الاختيار التانى ان يكون عندك باور سبلاى (مصدر طاقة ) على مكتبك و يا حبذا لو الباور بتاعك فيه شاشة تعرض لك الجهد و التيار

معظم المبتدئين بيلجأوا انهم يشتروا باور جاهز زى ده و بيكون منه انواع ديجيتال و انالوج كمان بيختلف سعره حسب امكانياته و معظم اللى فى السوق بيبقى انالوج و ردئ جدا و كمان سعره غالى

طيب ما تيجوا نعمل مصدر الباور بنفسنا و نستفيد من قطعه

قديمة متوفرة بكثرة فى اماكن كتير و تكلفتها اقل من نص سعر باور جديد و فيها حمايات و دواير و منظمات بتطلع باور مظبوط و احسن من الباور الردئ اللى فى السوق

الخامات اللى هنحتاجها :

بنانا بن (banana pin)
باور سبلاى قديم و يكون طبعاً شغال حتى لو مش بيشغل كمبيوتر
دائرة الجهد المتغير (الدايرة اللى هتخليك تتحكم و تاخد الجهد اللى انت عايزة)
شاشة فولتميتر و اميتر ديجيتال او انالوج (و دى اختيارى ممكن تعمل الباور من غيرها )

الادوات:

مسطرة
قدمة (ممكن تستغنى عنها)
قصافة
بنسه (زرادية)
مفك
شنيور و بنطة 3مم و 8مم ( و لو مش عندك شنيور و ما تقدرش تتعامل مع المعادن ممكن تاخد قياساتك و تنزل لأى ورشه و هو يعملها لك)
كاوية لحام

الخطوات :

هتاخد مقاسات الحاجات اللى هتتركب على الباور عندك و تعلم بقلم مكان الاماكن اللى هتخرمها و تبدأ ببنطه 3مم و بعد كده 8مم او حسب القطر الداخلى للحلقة العازله للبنانا بن.

كمان هتعمل فتحة للشاشة باستخدام البنطه 3مم زى ما فى الفيديو

بعد كده هتقسم الاسلاك حسب الوانهم

الاصفر 12 فولت
الاحمر 5 فولت
البرتقالى 3.3 فولت
الازرق سالب 12 فولت
الاسود سالب او ارضى او 0 فولت
الاخضر سلك التشغيل و بيتوصل مباشر مع الاسود لو الباور فيه مفتاح بالفعل و لو مافيهوش بتوصل مفتاح بينه و بين الاسود.