مبتدئ فى الالكترونيات؟! تعالى أما أقول لك #1
انك تتعلم الكترونيات كهوايه دى حاجه ظريفة جداً و أضمن لك انها هتخليك مشغول طول الوقت من غير ملل
و يمكن أغلب الإبداعات فى المجال ده بتطلع من الهواه أكتر من الدارسين فى الجامعات الا لو كانوا هواه برضو قبل ما ده يكون تخصصهم :)
بس تعالى هنا و قول لى بتتعلم الإلكترونيات ليه؟!
معظم اللى قابلتهم و كانوا بيتعلموا " و يمكن الكلام ده جديد شويه " لما كنت بسألهم عايزين تتعلموا ليه كان اغلب الرد:
انا عايز اعمل كواد كوبتر
انا عايز اعمل روبوت او لاين فولوور
و امثله من هذا القبيل
لحد هنا و الناس دى لا غبار عليهم
بس هتلاقى المعظم عايز يبدأ يتعلم أردوينو (ليه كده يا عم الحاج :) )
طيب ايه الصح ؟!
علشان تبدأ تتعلم لازم الاول تفهم يعنى ايه الكهرباء
و دى حاجه ممكن تعرفها من خلال فيديو على يوتيوب
بعد كده انت محتاج تعرف تقرأ الدياجرام بتاع الدوائر و هنا لازم تبقى عارف الشكل الحقيقى للمكونات و شكل الرمز بتاعها فى الرسم و برضو الموضوع مش هياخد معاك وقت
طيب تبدأ منين
بص يا سيدى واحدة واحدة كده مصدر طاقه يعنى مثلا بطارية و لد عرفت تشغلها هتبدأ تضيف سويتش علشان تتحكم ان انت اللى تشغلها و تفصلها
عديت المرحلة دى و الدنيا بقت واضحة شويه انت كده ممكن تبدأ بقى بدواير جامده شوية
طب استنى مش مفروض نتعلم معادلات و أرقام؟!
دى حاجه بترجع لك انت فى الاول و فى الاخر لو انت غاوى رياضيات هيبقى الموضوع ممتع انك تتعامل مع الالكترونيات بالارقام و الحسابات
طيب و لو مش غاوى رياضيات ؟!
وقتها هتتعلم بالتجربه يعنى هتشوف رسومات للدواير و تبدأ تطبق و تغير من معطيات الدايرة و تشوف التغييرات اللى بتحصل ساعتها الصورة بتبدأ توضح اكتر قدامك
هتلاقى نفسك كمان فهمت فكرة عمل معظم الدواير التناظرية "الانالوج"
و فهمت معظم الحساسات و كل حساس منهم بيشتغل ازاى.
حلو لحد هنا؟!
طيب ايه الخامات اللى هنحتاجها علشان نبدأ ده اللى هنعرفه مع بعض ان شاء الله فى المقال اللى جاى
تابعونا على المدونه
و لو عندكم اى سؤال ممكن تسيبوه فى تعليقات المقال او الصفحة
مبتدئ فى الالكترونيات؟! تعالى أما أقول لك #1
Reviewed by eslam
on
21:35
Rating:
Reviewed by eslam
on
21:35
Rating:
