إزاى نقرأ رسم المخطط الإلكترونى؟! #2

امبارح إتعرفنا على شوية حاجات مهمة فى قراءة الرسم و النهاردة هنكمل و هنكبر الدايرة بتاعتنا شوية و نعمل كمان شوية تجارب

كل اللى نفذ الدايرة امبارح لاحظ ان اللد بيفضل منور

طيب انا عايز اتحكم فى اللد ده و اخليه ينور لما انا احب من غير ما افصل البطارية و اوصلها كل شوية

هنا لازم اضيف للدايرة عنصر تحكم يخلينى اقدر اعمل الوظيفة دى

اول عنصر هبدأ بيه هو عنصر ميكانيكى بيحتاج انك تحركه بنفسك علشان يخلى اللد تنور

العنصر ده كنا اتكلمنا عنه امبارح

السويتش:

الرمز اللى ذكرناه امبارح هو واحد من رموز السويتش و الحقيقة السويتش ليه رموز كتيره حسب نوعيته

احيانا بيكون سويتش عادى خارج منه طرفين و احيانا سويتش شبهه فى الوظيفة بيكون ب 4 رجلين لكن فى الاخر الاتنين بيعملوا وظيفة واحده انهم يوصلوا طرفين من الدايرة مع بعض زى كده

او كده

بس هى فى الاخر خط مفتوح بشرطة بتشير ان دى نقطه مفتوحة فى الدايرة ممكن غلقها ميكانيكيا عن طريق المستخدم

طيب خلونا نضيف للرسم سويتش

هنا هنلاقى نفس الدايرة اللى فاتت بس الفرق ان الدايرة فيها جزء مفتوح مكتوب عليه S2 هنا التيار بيمر فى r1 و منه ل led1 بعد كده بييجى عند S2 و يقف يبقى اللد مش هينور الا لو s2 اتقفل و مرر التيار لأخر الدايرة

و من الدايرة دى نفهم ان التيار لأزم يمر فى مسار مغلق علشان الدواير تشتغل غير كده الدايرة مش هتشتغل

و دى طريقة تنفيذها على البريد بورد

طيب لغاية هنا عرفنا ازاى نتحكم فى لد عن طريق سويتش و دى ابسط دايرة ممكن تتعمل
طبعا ممكن تجربوا تغيروا اللد و تحطوا موتور او اى حاجه تانيه كحمل فى الدايرة علشان تتحكموا فيها عن طريق سويتش
كمان ممكن تجربوا توصلوا اكتر من لد على التوازى زى كده

بعض المصطلحات المستخدمه فى الموضوع هوضحها هنا:

مصدر الطاقة : ده ممكن يكون بطارية او محول او اى حاجه بتخرج جهد و طبعا احنا بنشتغل على جهد مستمر و قليل علشان نبقى فى أمان كمبتدئين فحذرا (ممنوع توصل اى حاجه بفيشة البيت)

الحمل : دى مقصود بيها اى حاجه بتشتغل عن طريق الكهرباء و دايما بتكون العنصر النهائى فى الدايرة و اللى بتبقى الدايرة كلها معمولة علشان تشغله

الدايرة المغلقة : دى الدايرة الشغالة اللى بيمر فيها التيار من الموجب مرورا بكل العناصر و يرجع للسالب ( فيزيائيا التيار بيمر من السالب للموجب لأن شحنة الالكترون سالبة اساساً)

الدايرة المفتوحة :ة و دى الدايرة اللى التيار مش بيمر فيها بسبب قطع او عنصر مش متصل و مش بتستهلك اى حاجه من مصدر الطاقة

يتبع...