إزاى نقرأ رسم المخطط الإلكترونى؟! #1

من أكتر الحاجات اللى بتخوف الناس من الالكترونيات و بتخليهم ما يدخلوش فى الموضوع أصلاً

هو البتاع اللى شبه العنكبوت أبو رجلين كتيره ده

المدعو IC

كلمة ic هى اختصار ل integrated circuit يعنى دائرة متكاملة مكونة من عناصر مختلقة و متقفلة جوه الباكدج الايبوكسى الاسود ابو رجلين كتير ده

علشان نقدر نتعامل مع المكونات الالكترونية لازم نتعلم الاول نقرأ الرسم

الرسم هو اللغة الموحدة و العالمية اللى ممكن أى شخص يفهم من خلالها الدواير و طرق توصيلها او يفهمه لحد تانى

لو اتعلمت تقرأ الرسم فعلى اقل تقدير انت هتقدر تنفذ الدوائر الجاهزة

طيب خلونا نشوف ازاى نقدر نتعرف على المخارج و المداخل اللى بتكون موجوده فى الرسم مع مقارنتها بالحقيقة

و هناخد NE555 كمثال و الحقيقة الرقم الاساسي هو 555 و مش بالضرورة يكون قبله NE احيانا بتكون حروف مختلفة حسب الشركة المصنعة

لو بصينا فى الصورة هنا هنلاقى فى السطر الأول معلومات الشركة المصنعة

فى السر التانى رقم القطعه و ده اللى احنا محتاجينه

فى التالت بيانات التشغيله

الشكل الحقيقي فى الرسم

الاى سى بتاعنا هو المربع اللى فى نص الرسم و هنلاحظ ان 4 و 8 جنب بعض و 3 فى جنب لوحدها

1و2 لوحدهم تحت

6و7 على اليمين

علشان نقدر نعرف اماكن الرجلين دى هنبحث فى جوجل برقم القطعه NE555 pinout

هيظهر لك ارقام البن الخاص بالاى سى ووظيفة كل واحده منهم

علشان تقدر تحدد اول رجل فى الاى سى اللى هى رقم 1 هتمسك الاى سى و تبص على حفرة بتبقى فى الطرف او نقطه

لو لقيت نقطة هتبقى مقابلة دايما للرجل رقم 1تبدأ تعد الرجلين من فوق لتحت و الجهه التانية من تحت لفوق

لو ما لقيتش النقطه هتلاقى حفر فى طرف الاى سى و الرجل رقم 1 دايما بتبقى على شماله هتمسك الاى سى و تبدأ تعد زى ما قلنا

اهم اختصارين هيقابلوك فى الرسم هما - و +

او VCC و GND

و دول بيعبروا عن طرفين مصدر الطاقة ولازم مراعاة القطبية و عدم عكسها

بالنسبة للترانزستور:

احنا معانا 2n2222 او bc547
الترانزستور بيحتوى على 3 رجلين
طرف بياخد كهربا و طرف بيخرج الكهربا و التالت بيتحكم فى التوصيل و الفصل بين الطرفين
و اساميهم بالعربى مجمع و قاعدة و مشع
و بالانجليزي collector , base , emmiter
و بيرمز ليهم بالاختصارات دى c b e
الرمز بتاعه فى الرسم

هنا بيوضح الاطراف c و e على استقامة واحدة و دول اللى بيتنقل فيهم الكهربا و الطرف التالت b ده الخاص بالتوصيل بين الاتنين لما بتوصل كهرباء بتيار معين للطرف ده هو اللى بيوصل بين الاتنين دول .

و طريقة معرفة الارجل فى الشكل الحقيقى

بتمسك الترانزستور و تخلى الوجه المسطح ناحيتك و أول رجل على ايدك الشمال هي رقم 1 يعنى هتعد ارقام الرجلين من الشمال لليمين

هتلاقيه هنا محدد الارقام
مجمع 1 collector
قاعدة 2 base
مشع 3 emitter

و مهم نعرف ان ترتيب الرجلين بيختلف حسب رقم الموديل يعنى ممكن تلاقى base collector emitter او emitter base collector
لازم فى كل مرة تستخدم رقم جديد من الترانزيستورات تشوف الpinout الخاص بيه علشان توصله صح

بالنسبة للدايود :

هو عنصر له طرفين بس و ما ينفعش يتركب مقلوب يبوظ شغل الدايرة تماما لأن له قطبيه بيعدى التيار فى اتجاه واحد و ما يسمحش برجوعه

الرمز فوق و الشكل الحقيقى المقابل ليه تحت و الشريط اللى بيبقى على الدايود بيشير للطرف السالب

اللد:

نوع من انواع الدايود و led اختصار ل light emitting diode
و برضو ليه اتجاه فى التركيب و لو اتقلب ما يشتغلش

هنا الرمز الخاص باللد و هنلاحظ انه شكل الدايود بالظبط بس خارج منه سهمين صغيرين مقصود بيهم انه مضئ
فى الشكل الحقيقى بنعرف قطبية اللد من خلال الرجل القصيرة بتبقى هى السالب و التانيه موجب
لو الرجلين نفس الطول و دى نادره تبص على اللد من الجمب هتلاقى فى حتة مسطحة ناحية الرجل السالبه

المقاومة :

و دى اكيد شكلها مألوف جدا للغالبيه

فى الصورة الشكل الأول هو الشكل الفيزيائى للمقاومة
الشكل التانى الزيج زاج ده الرمز الامريكى و معمول زيج زاج كتعبير عن ان هى بتمثل مسار صعب على التيار علشان تعيقه
الشكل التالت هو الرمز العالمى و مش شائع استخدامه زى الامريكى بس هتشوفة برضو فى الرسم فخليك فاكره

المقاومة بيتعرف قيمتها من خلال الالوان اللى عليها ممكن تحمل برنامج electrodroid على موبايلك هيساعدك تتعرف على قيمة اى مقاومة بسهولة بدل ما تحفظ جدول الالوان

السويتش :

و ده الزرار اللى بتدوس عليه فى معظم الاجهزة زى زرار الصوت فى التليفزيون او اى زرار بتدوس عليه علشان ينفذ مهمه
بيرمز له بالرمز ده

لما بتدوس عليه بتوصل الدايرة فيمر التيار من خلاله و لما بتشيل ايدك بتوقف مرور التيار

البطارية

البطارية :

بيبقى ليها قطب موجب و قطب سالب كل البطاريات على الاقل بيبقى مشار للطرف الموجب عليها من خلال المصنع

فى رمز البطارية هنلاقيها عبارة عن خط كبير و خط صغير و مكون منهم مجموعه كل خط كبير مع واحد صغير معناهم خلية واحده و عموما النقطة دى مش مهمه اوى لأن احنا المهم نعرف جهدها و خلاص مش لازم نكونها من خلايا زى ما الرسم بيقول

طيب لغاية هنا خلينا ننفذ دايرة بسيطه مع بعض علشان نتأكد من معلوماتنا و بعد كده هندخل فى الدواير الكبيرة شويه